مواضيع اليوم
أبو الهول و الإخوان المسلمين
فيه ناس بتجول إن ولا مؤاخذيه فيه إنجلاب ف لِخوان وناس تانيِه بيجولُم إن ديه تصحيح ولا مؤاخذيه مسار وناس تالتيه بتجول إن الحكومِه هي السَبب والكلام كوتُر ف البلد ومحدش عارف عَلاوليه إيه الموضوع جُمْت آني واخِد بعضي وجايلك علي طول أستَفهَم مِنك ..
أمال إيه مش إنت مصاحِب الكُبّارات كُلاتهُم يُبْجَي لازم السِر حِداك .. طب المورشِد أبويا الحاج محمد أبو عاكف إستجال م الإرشاد ليه .. إيويه إتلائِم وإعمِل روحك مش عارف .. طب أبويا الحاج محمد أبو حبيب النائب لَاول إستجال ليه روخَر ؟
وبعدين يابا الحاج أبو الهول هو لِخوان حِداهُم طُعون زي مجلس الشعب ولّا زي مجلس الشعب أمال بيجولو إخوه ليه هُمْن الإخوه بيطعنوا ف بعض بَرضَك .. والنبي آني ماني فاهم حاجيه علاوليه..
وكمان الناس كُلاتها بتجول إن فيه إخوان مِحافظين وإخوان تانيه إصلاحيين يعني ولا مؤاخذيه مش مِحافظين ولتنين مِخْتِلفين ف المسائل الشرعيه ..
طب هُمن مِخْتلفين ف إيه .. طب والحكومِه إيه دخلها ف الموضوع .. هي الحكومِه ولا مؤاخذيه إتدخلت بيناتهم ولا إتدخلت بيناتهم جبل كيديه ..؟
فيه ناس بتجول والعِلم عند الله إن الحكومِه عملت ليهم عمل حيدا شيخ كَبير ف بلاد برّه إسمه .. والنبي نسيت إسمه .. المُهمَن يابا الحاج أبو الهول الناس بتجول إن الحكومِه رَشِّت ولا مؤاخذيه العمل ديه علي عتبه لِخْوان المُسِلمين .. جوم إيه لِخوان لما عدوا ب رجليهم ع العمل وِجعُم ف بعض وَجعَه سودا واللي كان كان عشان ما يُدخلوش لنتخابات بتاعه مجلس الشعب الجايِه أَمَال إيه علي ما تيجي لِنتخابات يكون لِخوان لسه جاعدين حيدا باب الطعون مستنيين النتيجيِه وتعدي لِنتخابات ولا يَحزنون ..
بس تِفتِكر يابا الحاج أبو الهول الحكومِه عملت لِلخوان المُسِلْمين عمل بصَحيح .. لو كان الكلام بصحيح طب الحكوِمه ما عملتشي للشعب كُلاته عمل ليه عشان تستريَّح مِنُّه ..
طب لو مش الحكومه اللي عَملَت العمل دِيه تفتكر مين يابا الحاج أبو الهول بتاع عُمولات ف البلد دي هُوَنْ اللي عملها ..
أجولك أحسن حل لِخوان يروحُم للشيخ حسونِه اللي بيشوف الأطَر وهو يشوف لهم الأطَر عَشان يِعرَفُم مين العَدِو ومين الحبيب ومين اللي جاعِد يعملهم ف عُمولات ..
وأبويا الحاج محمد أبو حبيب يفضل حبيب ..
أستر ع لِخوان المُسِلْمين يارب
مجدي المصري
التعليقات (0)