أبو الهول و أحزاب المعارضه و البرادعي

                                   أبو الهول وأحزاب المعارضه والبرادعي
العواف عليكو يابا الحاج أبو الهول .. إزيك كيديه وإزاي لَحْوال ..
لأ .. البلد بخير كُلاتها ..
لأ .. البيه وزير الماليه لسه ماجاش حِدانا ياخُد الضرايب العكاريه .. الناس كُلاتها عملَت حسابها .. وكل نفر حِداه دار شال العريش بتاعه عشان ولا مؤاخذيه ما يدفعشي ضرايب عكاريه .. ينامو فِ الطل أحسن مَ البيه وزير الماليه مَ ياخد فلوسهم ..
آني جايلك النهارديه ف موضوع كيديه ..
لأ .. الناس مكلفاني آجي أجولك عليه .. إيويه الناس بتجولك والنبي تشد تلغراف لابويا الحاج محمد أبو البرادعي ..
لأ .. آني عارف إنو مش صاحبك .. ولو صاحبك .. سرك ف بير .. مش حَ جول لحد عشان الحَكومِه م تجلبشي عليك ..
حِلمك عليا شويه .. أصل البلد كُلاتها سمعت ف نشره لخبار ف الراديون إن أحزاب المعارضِه شَكَلت "جبهه الصمود والتصدي" لَبويا الحاج محمد أبو البرادعي وجبهته ..
لأ .. المُشكِل إن الناس كُلاتها متعرفشي أسامي لحزاب دِيان ولا عناوينهم ولا البهوات الكُبرات بتاعُتهُم .. إيويه أول مره نسمع أساميهم ..
فيه ناس جالت لحزاب دِيان فاتحه ف بوركينا فاسو وناس تانيه جَالَت لحزاب دِيان حيداهُم دكاكين سوبر ماركن .. إرْبَع تِركن إنت ..
جام سماعين أفندي جال ياناس لحزاب دِيان مصريه والبهوات صحابها مصريين بس ولا مؤاخذيه لحزاب ديان "إن فِزَبول" ..
إيويه هُوَن جال كيديه إن فِزَبول .. هي "إن" ديان وخواتها كُلاتهم عارفينهم بتعوت الشرط بتاع النحوي .. بس فزبول ديه والعلم عند الله حاجه كيديه زي النُقْرُص بتاع العَضم والعِيازُ بالله ولا مؤاخذيه ..
لأ .. م تخافشي يابا الحاج أبو الهول مش كلمه أبيحه لسمح الله .. بس أول م سماعين افندي م جال "إن فزبول" الناس كُلاتها جالت .. أعوز بالله م الشيطان الرجيم .. قل أعوز برب الناس .. قل أعوز برب الفلق .. جام سماعين افندي جايل ياناس الموضوع مش كيديه .. الموضوع إن الناس كُلاتها لازم تدعيلهم بالشِفا ..
جمت آني جايل .. الموضوع ديه من غير مفهوميه .. نُقْرُص .. المهمن يابا الحاج أبو الهول مش عايزين نجيب ف سيره النُقرُص .. هُمّن برضك أحزاب ف البلد وبياخدو دعم م الحَكومِه ..
لأ .. الحَكومِه بتدفع ليهم الإيجار والدخان المِعسِل ..
لأ .. الحَكومِه محرجه ع لحزاب ديان م يشربوش ميه الحنفيه .. بيشربو سفن اب .. هُمَن دفعين حاجه كُلاتُه م الدعم بتاع الحَكومِه ..
المُهمَن يابا الحاج أبو الهول سايج عليك النبي تشد تلغراف لابويا الحاج محمد أبو البرادعي وتخليه يجول الجبهه بتاعتي هيان المعارضه ومفيش غيرهِه .. جوم البهوات بتوع لحزاب إياهِه يطلعو الورج اللي حَداهم والناس كلاتها تعرف إنهم أحزاب ..
لأ .. حلمك شويه .. أول مَ الناس تعرف إنهم أحزاب ..البيه وزير الماليه يحش وِسطُهم دوغري .. ضرايب ع السفن أب والمِعسِل اللي بيشربوه م الدعم بتاع الحَكومِه .. والحَكومِه تِخزا شويِه وتدي الدعم ديه للشعب ..وكل مواطن يشرب سفن اب ويدعي للحَكومِه ..
إلا جولّي يابا الحاج أبو الهول .. هون السفن اب ديه ولا مؤاخذيه خَمرِه ؟؟
أستر ع السفن أب يارب
مجدي المصري