أبو الهول ومجلس الشوره

                                                                       أبو الهول ومجلس الشوري
العواف عليك يابا الحاج أبو الهول .. إزيك كيديه وزاي لَحوال ..
اليومين دولَم التصاوير و لِعلانات مَلَت الشوارع والحيطان .. إي والنبي الحيطان كُلاتها تصاوير مِفتِخريه ..
لأ .. مش السيميه .. دولَم البهوات المترشحين ..
وكُلاتهم بهاوات كُبارات .. اللي داكتور واللي مُهندز واللي مُستسار واللي لِويه .
إيو النبي حاجِه تِشرح الجَلب العليل ..
لا .. يابا الحاج أبو الهول .. كُلاتهم مترشحين لمجلس الشورِه ..إيويه .. الأمر شورُه بَناتكُم .. الشرع بيجول كيديه .. جوم إيه البهوات دولَم كُلاتهُم راحو مترشحين ..
إفهم يابا الحاج أبو الهول .. البهاوات دولَم كُلاتهم مترشحين بالشرع والدين أُمال إيه البلد كُلاتها النهارديه ماشيِه بالشرع والدين ..
لأ .. الحكومِه ماشيه بالشرع والدين .. حد يجدر يجول غير كيديه !!
لأ .. الحكومِه دايره ولا مؤاخذيه تأفش ف لخوان المُسِلمين ..
أصل هُمن لخوان المُسِلمين دولَم كل إنتخابات يعملو بُليكيه وزمبليطِه ويجولُم الحيزب مش ماشي ع شرع ربونا ..
طب يابا الحاج أبو الهول ولا مؤاخذيه ف ديه السؤال .. لما الحيزب مش ماشي ع شرع ربونا .. ربونا مباركله ف الجرشينات ليه ؟
د البهوات الكُبارات بتوع الحيزب دولم أغني ناس ف البلد وربونا طارح ليهم البركه ف فلوسهم وعمالِه بتزيد كل يوم ..
لأ .. اللهم لا حسد .. اللي بيحسدهم لخوان المُسِلمين .. هُمَن اللي بيحسدو الحيزب .. وبرضك لخوان المُسِلمين دولَم حيداهم فلوس ياما والنبي يابا الحاج أبو الهول فيه ناس مِنيهم أغني م الحيزب كُلاتُه ..
المُهمن عشان م أطولشي عليك يابا الحاج أبو الهول .. الحيزب ولخوان دولَم أغني ناس ف البلد .. وهُمن لتنين اللي بينجحوا ف لنتخابات ..
أصل ولا مؤاخذيه كيديه الفُجَرا اللي زي حالانِه مالهومشي ف لنتخابات .. العين جصيرِه وِليد بصيرِه ..
جوم إيه .. الحكومِه جَبْل لنتخابات تأفَش ف لخوان وبعد لنتخابات يرجعو تاني سمنه علي عسل .. إي والنبي سمنه بس نباتين مش سمنه بلدي ..
المُهِمن يابا الحاج أبو الهول عشان م أطولشي عليك البهوات الكُبارات دولَم اللي تصاويرهم ماليِه الحيطان .. كُبارات بصحيح الله يكون ف عونهُم ويصبرهُم علينِه إيويه علينِه .. حاكم إحنا شعب مساعير علاوليه ..
كل بيه من دولَم لما بينزل حيدنا البلد ..
لأ .. هوَن بينزل حيدانا البلد جبْل لنتخابات بس وبعد النتيجِه .. ولا يحزنون ..
المُهمَن .. لما البيه من دولَم بينزل حيدانا البلد .. الناس كُلاتها زي المساعير يجرو عليه .. كل نفر فسل شايل ف إيده طلب .. اللي حيداه عيل عاوز يوظفه ف الكهربا .. واللي أُمه عيانِه وعاوز الحكومِه تعالجهاله .. واللي عاوز شُجه من بتوع المساكن .. واللي عاوز يبني مخالف .. واللي عاوز عداد ميه .. واللي عاوز الشارع يترصف جُدام دارهم .. واللي عاوز يتطوع ف الجيش .. واللي عاوز يتجَوز .. واللي عاوز يسافر السعوديه .. مولد يابا الحاج أبو الهول وعُمُر ..
أصل ولا مؤاخذيه .. لو الحاجات ديان كُلاتها البهوات المترشحين م عملوهاش اليومين دولَم .. وجت لنتخابات وإنفض المولد ..الناس كُلاتها ح تاخُد ولا مؤاخذيه صابونِه ولا يحزنون ..
لأ .. صابونِه مش لوكس بريحيه .. صابونِه تانيه .. بلاش أحسن ..
المُهمَن عشان م أطولشي عليك .. حيس إن كُلاته بالشرع والدين .. البهوات دولَم بييجوم يصلوا الجُمعِه حيدانا ف الجامع ويا الناس .. والنبي يابا الحاج زبيبه الصلا منوره ف وشوشهم زي البدر .. وكل م نفر يديهم طلب يتبسموا ويجولو حاضر من عينيا الجوز بس هِمتكُم ويانا ف لنتخابات ..
والنبي يابا الحاج أبو الهول الناس كُلاتها مِكلفاني أجولك تجول ل لحَكومِه تأجَل لنتخابات شويِه .. أصل الناس حيداهم طلبات ياما وعاوزين البهوات يخلصوهالهُم لاول جبل لنتخابات .. بدل م ياخدوم الصابونِه ..
                                     أستر ع الصابونِه يارب
مجدي المصري