آه ياديرة اهلنه

2009-06-09 16:16:54

آه ياديرة اهلنه

ظلمه احزان وغيـــاب
گليبي مايحمل عذاب
گمر مايشبه گمرنه
اه ياديرة اهلنه.....
الشوارع مو شوارع
كلهه لوعات ومواجع
منين مانمشي عثرنه
اه ياديرة اهلنه.....
الحزن ماخذ مكانه
للقهر والهم خذانه
احنه ضيعنه دربنه
اه ياديرة اهلنه.....
صرنه هسه بلا امل
عيون من تبچي مقل
والانين اصبح طبعنه
اه ياديرة اهلنه.....
حبهه كبّرنه ورعانه
وكلشي بيهه وَدِعانه
بيوم من شلنه ورحلنه
اه ياديرة اهلنه.....
بروحي اشواگ وحنين
عبره خلتهه السنين
بالالم جبنه عمرنه
اه ياديرة اهلنه.....

وااااه ياديرة اهلنه
خل أسولف ذكرياتي
چانت ايام بحياتي
تمطر اشواگ ومَحَنه
اه ياديرة اهلنه.....
دجله وياهه الفرات
ع المزارع جاريات
خضرن بالحب زرعنه
اه ياديرة اهلنه.....
المدرسه وذيچ الشوارع
والفرح من بيته طالع
چان ناسينه ألمْنه
اه ياديرة اهلنه.....
طيور فرحانه بسماهه
ونخلة البيت شحلاهه
بالرطب حمل عثگنه
اه ياديرة اهلنه.....
طبع جيراني الكريم
ودفتر اشعاري القديم
أبد مانلگه مثلنه
اه ياديرة اهلنه.....
والتعاليل الطويله
ويه مدگوگة جميله
تكتمل ليلة سمرنه
اه ياديرة اهلنه.....
شمحله لمات الحبايب
مانسجل يوم غايب
كلهه حضرت فرحت النه
اه ياديرة اهلنه....
نقره اشعار وجرايد
والقصايد مو قصايد
بلبل وبيهه تغنه
اه ياديرة اهلنه....

وااااه ياديرة اهلنه
كلشي لعيونچ رخص
اّخ لو ترجع فرص
چان بيديچ انشتلنه
اه ياديرة اهلنه....
لو اشوفچ مره وحده
من الله راح اطلبهه شحده
غير هذا شِنْتمنه
اه ياديرة اهلنه....
ويه اّذان الجوامع
راح اگلچ اني راجع
وماتظل بگليبي ونه
اه ياديرة اهلنه.....
گلبي خطار بمضيفچ
اليوم راجعلچ وليفچ
فتحي ابوابچ يجنه
اه ياديرة اهلنه....
عَلَگِتْ روحي اعله بابچ
لو عذابي من عذابچ
عمري يرخص شغله منه؟
اه ياديرة اهلنه.....
بيدچ امْحيتي الماّسي
وعلى صدرچ طاح راسي
تنفَسِتْ ريحة وطنه
واااااه ياريحة وطنه0