(( قصة جديدة وحصريا على مدونات ايلاف بقلمى وتأليفى ))

عنوان القصة (( يوميات فرحان )) 

تأليف :- مفتاح اللافى

(( الحلقة الاولى ))

فرحان وهو جالس فى البيت لوحده يقول فى سره ( قاعد بروحى فى هالحوش ماعندى حد يونسنى لازم ندور على بنية حلال تكمل معايا مشوارى تبقالى رفيقة فى حياتى ياسر من العزوبية ) ( زعمك من تختار يافرحان من تختار ... اه لقيتها ) وفيه فاصل موسيقى وبعده يطق فرحان على باب تفتحله بنت عمته ويقولها ( خير يا خيرية عمتى قعدة فى الحوش ؟ وترد عليه خيرية :- قعدة يافرحان خش انت واحد مالعيلة خيرك متحشم خش , ويخش فرحان ويقول :- مسالخير ياعمتى مسعودة شن حالك وحال صحيحتك ؟ تقوله :- الحمد لله ياوليد خوى شن حالك انت وشن حال باباك انشالله توة كويس ؟ فرحان :- باهى ياعمتى البارح عطوه دواء وتوة صحته باهية . ياعمتى !!! العمة :- شنى يافرحان بتقول ؟ فرحان :- والله ياعمتى انى متحشم شوية . العمة :- ماتتحشمش رانى زى امك الله يرحمها قول شن تبى . فرحان :- انى زى ماتشوفى ياعمتى كبرت وانشدى حتى باباى يقولك قداش عمرى توة وانتى عارفة فى حوشنا ماهناك حد الا انى وباباى وماهناكش من يعاوننا فى الحوش وانى جايك طالب ايد بنتك خيرية ومتعشم فيك توافقى ياعمتى . العمة :- انى مانلقاش خير منك لبنتى يافرحان لكن الراى الاول والاخير لخيرية بنتى خلى توة ناخذ رايها وبعد يومين نرد عليك . وتمر الايام بسرعة ويأتى اليوم الموعود وتتصل العمة بفرحان بالهاتف – يرن الهاتف وفرحان مشغول ويقول :- منى هالحصلة اللى يتصل توة فى القايلة , ويرد عالهاتف ويقول :- ايوة منى معاى , ترد عليه عمته :- انى عمتك يافرحان , فرحان :- اووه عمتى سامحينى كنت مشغول شوية شن حالك ياعمتى وشن حال العويلة ؟ العمة :- كلنا باهيين ونسلموا عليك شن حال بوك , فرحان :- باهى اهو مقعمز يتفرج عالنشرة لو كان تبيه نناديهولك , العمة :- خليه يتفرج المهم ياولدى البنت وافقت عليك وانى مانلقاش ليها احسن منكم توة قول لباباك تجونا غدوة باش تخطبوا البنت , فرحان :- والله فرحتينى ياعمتى وانى قبل كنت فرحان بس واليوم بديت فرحان الفرحان والله ياعمتى كان مش عيب توة نزغرط , العمة :- انى نزغرط ياوليدى ومبروك عليك وهى توة نخليك تكلم باباك وسلملى عليه , فرحان :- ماشى ياعمتى بالسلامة , فرحان :- يابوى يابوى , الاب :- شنى يافرحان ؟ خيرك قريب تطير مالفرحة , فرحان :- عمتى كلمتنى توة تسلم عليك وقالت خيرية موافقة وغدوة تبينا نمشولهم نخطبوا خيرية , الاب :- مبروك ياوليدى مبروك يامن عاش لى غدوة . ويأتى الصبح وفرحان مستعجل ينوض فى بوه مع صياح الديك , والاب ماباش ينوض المهم فرحان يفكر كيف يخلى بوه ينوض قال فى نفسه ( لقيتها نقوله نشرة الاخبار بدت توة ينوض ) ينادى فرحان فى ودن بوه يقوله ( نشرة الاخبار بدت يابوى نوض توة ) وبالفعل ينوض الحاج ويغسل وجهه ويمشى للتلفاز يلقاه مصكر ويشبح الساعة يلقاها ساعة 8 الصبح يقول لفرحان :- خيرك كذبت عليا وتبينى ننوض من توة , يقوله فرحان :- باش نمشوا لحوش عمتى يابوى , الاب :- مازال بكرى يافرحان ياولدى شورك مارقدتش بكل مش من عوايدك تنوض بكرى . فرحان :- كيف تبى يجينى نوم وانى قلبى مشغول بخيرية 24 ساعة , الاب :- باهى يافرحان وانت خيرية خيرية شورك ماصدقت تحب , فرحان :- امتى بنمشو لحوش عمتى يابوى ؟ الاب :- انزل يافرحان وسخن السيارة وانى خلى نلبس حوايجى وتوة نجيك , نزل فرحان بالبدلة المقروطة بيسخن السيارة وبالفعل سخن السيارة وبدى يضرب فى الكلاكسات ونزل بوه يعارك :- بالشوية عالكلاكس بالشوية شنى تحسابنا ماشيين لى عرس , فرحان :- هيا استلم وخلينى مساعد سواق , الاب :- عارفك والله ماك فالح الا فالكلام بس , ويمشو بالسيارة وفى الطريق يوقف فرحان بوه على محل حلويات , فرحان :- وقف هنى يابوى مايجيش نمشوا نخطبوا البنت بدون مانرفعوا هدية , الاب :- باهى انزل وجيبلهم حاجة باهية مش زى عوايدك , يراجى الحاج فى السيارة ويقول : خيره الولد عطل , ويجى فرحان بطبق صغير , فيسأله بوه :- خيره الطبق صغير يافرحان ؟ فرحان :- لان يابوى فيه طرفين بسبوسة , الاب :- طرفين بس ياظالم ليش ماحسبتنيش انى وعمتك ؟ فرحان :- والله ماصارها انت وعمتى عندكم السكر مش باهى ليكم الحلو , ويستغاظ الاب ويقول :- اه ياحليلى منك ديمة متعبنى ديمة , ويوصلوا لحوش العمة مسعودة , يطق الباب وتفتح خيرية , الاب :- اوهوو خيرية شن حالك والله وكبرتى وبديتى عروسة يابنيتى ,خيرية :- شن حالك ياعمى عياد خش تفضل امى الداخل ويخش الحاج عياد , وبعده فرحان ومعاه الهدية يقول فرحان :- شن حلك ياخويرة ؟ خيرية :- باهى يافروحة . تفضل انت مش برانى هات عليك الصفرة . فرحان :- لا خلى عليك مش رزينة هلبة , خيرية :- هى تفضل , فرحان :- زاد فضلك يابنية عمتى , ويخش الاب وولده على العمة يسلم الخو على اخته الاخ :- شن حالك ياوخيتى وشن حال صحيحتك وانشالله ايامنا ديمة افراح , الاخت :- انشالله ياخوى انت شن حال صحيحتك انشالله الدواء مشى معاك , الاب :- الحمد لله توة احسن من قبل ياوخيتى , خلينا توة نخشوا فى المهم , انتى عارفتينى لاش جاى انى وولدى فرحان جاى بنخطب بنيتك خيرية لوليدى فرحان شن قلتى ياوخيتى ؟ الاخت :- والله مانلقا لبنيتى احسن من فرحان والبنت قدامكم وخودوا رايها منها هيا , الاب :- شن قلتى يابنيتى ياخيرية ؟ خيرية :- اللى تقوله امى موافقة عليه . وتجرى خيرية خجلانة لدارها , ويقول فرحان :- هيا يابوى نقروا الفاتحة السكوت علامة الرضا , الاب :- خيرك مستعجل يافرحان احنى مانبوش نديروا خطوبة توة نبوا نديروا الخطوبة قبل العرس بيوم شن رايك ياوخيتى ؟ الاخت :- اللى تديره باهى ياخوى والبنت بنتك , الاب :- امالا توكلنا على الله والخميس الجاى العرس وطى روحك وجهزى البنية وهذوا خمسة الاف دينار دبرى بيهم حالك انتى والبنت , الاخت :- لاش مكلف روحك ياخوى احنى اهم شى عندى سترة البنت من راجل يحميها , الاخ :- هى توة نقولك السلام ونتلاقوا على خير وكان تبى حاجة اتصلى بيا ياوخيتى . الاخت :- ربى مايحرمنى منك ياوخييى , بالسلامة , فرحان :- بالسلامة ياعمتى راك تنسى تسلميلى على خطيبتى , العمة :- باهى يافروحة رد بالك على بوك وانشالله توصلو سالمين , ويروح الاب و فرحان مسرورين فى انتظار موعد العرس .

الى اللقاء فى الحلقة القادمة